Verwikkelde debuut beindruk – Rapport – 3.11.2013

Slagyster deur Rudie van Rensburg. Uitgewer: Queillerie. Kalahari: R190. Resensent: Elzette Steenkamp

Rudie van Rensburg se spanningsverhaal Slagyster verras met ’n kompleksiteit wat ’n mens nie aldag van ’n debuut­roman verwag nie. 

Die bloedige burgeroorlog wat in 2009 in Nigerië tussen die wankelrige regering en talle rebelle-groepe gewoed het, dien as agtergrond vir hierdie ambisieuse verhaal.

Gewigtige kwessies soos onwettige wapenhandel in Afrika, korrupsie in die SAPD, en die grootskaalse uitbuiting van die omgewing en die inheemse bevolking deur die groot interna­sionale oliemaatskappye wat in die Niger-delta doenig is, word aangedurf. Dit is ’n ingewikkelde storielyn dié. Daar is baie spelers op die bord en ’n mens moet maar kophou om by te bly met hoe sake inmekaar steek. Die verhaal word uit die oogpunt van talle karakters vertel en flits kort-kort van die een perspektief na die ander. Hier is die hooftrekke – ek hoop jy kan byhou!

Ryan Deetlefs, ’n Suid-Afrikaanse werknemer van die Amerikaanse Star Petro-oliemaatskappy, word iewers in die woude van die Niger-delta deur ’n bloeddorstige rebelle-groep as gyselaar gehou. 

Carl Bester, ’n afgetrede polisieman, word deur sy voormalige bevelvoerder, direkteur Piet Wessels, as polisie-mol by onwettige wapentransaksies betrek. Eintlik het Carl nie veel van ’n keuse nie, want Wessels dreig om ’n geheim te verklap wat Carl in die tronk kan laat beland as hy nie saamspeel nie.

Danksy ’n lonende ooreenkoms met een van Nigerië se grootste spelers in onwettige wapenhandel, kan die base van Haarhoff, Van Dyk en Malan Transport in Kaapstad bekostig om hul vroue se plastiese sjirurgie-rekeninge, luukse motors en Irma Steins af te betaal. Maar dit lyk of een van die vennote, Brink van Dyk, koue voete begin kry oor die maatskappy se betrokkenheid by die Taliban.

Dan is daar ook nog die bekroonde joernalis Amelia Smit wat Ryan Deetlefs se ontvoering in Nigerië en Star Petro se verdagte hantering van die saak ondersoek.

Die ster van die verhaal is ongetwyfeld inspekteur Kassie Kasselman, wat al die drade van hierdie storie bymekaar moet bring. 

Kasselman is ’n onwaarskynlike held. Hy dra ’n onaansienlike rooi windjakker, versamel seëls, luister net na boeremusiek, is sosiaal wanaangepas en hou ’n botteltjie Rescue Remedy in sy lessenaar se laai. 

So op sy beskeie manier kom Kassie stadig maar seker agter die kap van die byl en sy skerp waarnemings laat die skuldiges gou-gou in hul Gucci-loafers ­bewe.

Enige skrywer wat so ’n ingewikkelde storie aanpak, loop die gevaar dat hierdie bokspringe verwarrend vir lesers kan wees, maar soos die verhaal met die vernuf van ’n ervare storieverteller ontvou, besef jy: Dit wérk. En dit werk moeiteloos.

Ek was lanklaas so beïndruk met ’n boek, laat staan nog ’n debuutroman.
Dr. Elzette Steenkamp is betrokke by LitNet.