KAAPSTAD. – Uiteenlopende debuutwerke ding vanjaar mee om die Jan Rabie-Rapportprys.
Die prys is oop aan alle uitgewers en word vir ’n uitnemende debuut of vroeë Afrikaanse prosawerk uitgeloof.
Dit het ’n geldwaarde van R35 000 en die wenners word Vrydagaand saam met die ander Media24-pryse bekend gemaak.
Op dié kortlys is Carié Maas met Koljander, Rudie van Rensburg met Slagyster en Dominique Botha met Valsrivier. Botha is vanjaar die ontvanger van die Eugène Marais-prys vir Valsrivier en is op die kortlys vir die Sunday Times-fiksieprys.
Koljander is die prys as debuutwenner in die Groot Afrikaanse Roman-wedstryd van 2012 deur en deur werd, skryf Annemarie van der Walt in haar resensie op Boeke24.
Jonathan Amid skryf op LitNet wat hom as leser van die boek bybly, is die manier waarop Maas die “vinkel” en “koljander” in haar resep – die uiteenlopende kleure en geure van menswees, die lief en leed waarvan sy skryf waaraan ’n mens eenvoudig nie kan ontsnap nie – op so ’n manier vermeng dat dit iets nuuts en toegankliks vir die leser bied sonder om kompleksiteit prys te gee. “Anders gestel: Maas se kunstigheid hier is om tekens van kunsmatigheid uit die weg te ruim.”
Oor Slagyster skryf Deborah Steinmair op LitNet: “Die spanning verkry dodelike momentum en die dikkerige boek word min of meer in een sessie verslind. Hierdie wiewassit word hoog aanbeveel vir onversadigbare misdaadvrate.”
Elzette Steenkamp meen in Rapport oor dié debuut: “Dit verras met ’n kompleksiteit wat ’n mens nie aldag van ’n debuutroman verwag nie.
“Enige skrywer wat so ’n ingewikkelde storie aanpak, loop die gevaar dat hierdie bokspringe verwarrend vir lesers kan wees, maar soos die verhaal met die vernuf van ’n ervare storieverteller ontvou, besef jy: Dit wérk. En dit werk moeiteloos. Ek was lanklaas so beïndruk met ’n boek, laat staan nog ’n debuutroman.”
Oor Valsrivier skryf Joan Hambidge in haar resensie op Boeke24 dit is “ ’n prosateks wat beweeg tussen die grense van vertelling en poësie” en sê: “Dis beeldskoon, hierdie debuut”.
Willie Burger skryf in sy bespreking van die boek in Vrouekeur wat ’n mens Valsrivier laat aanhou lees, is “die meesterlike manier waarop vertel word”.
Diue Burger
Top