Van die Kaapse gang lands tot die Krugerwildtuin met sy renosterstropers; tussen ’n verslonsde Bolandse hoewe met ’n grieselrige visdam en die glans-en-skanswêreld van diplomasie, vind kaptein Kassie Kasselman sy pad voel-voel in Rudie van Rensburg se nuwe misdaadroman, Pirana.
Dié vierde boek van Van Rensburg word Donderdag 26 Mei by die Dros-restaurant in Willowbridge, Bellville, bekendgestel, waar Elna van der Merwe, boekeredakteur vanHuisgenoot, met hom sal gesels.
“Kassie en sy kollega, sersant Rooi Els, se speurvernuf word weer ernstig in Pirana beproef – dit terwyl iemand op die agtergrond sy tande geduldig met wraakgedagtes slyp,” sê Van Rensburg, ’n inwoner van Welgemoed.
“Ek het lekker aan die boek geskryf, maar moes heelwat navorsing doen om die agtergrond vir baie van die verhaallyne geloofwaardig te hou. Ek het onder meer ook kontak gemaak met lede van die Amerikaanse Pirana-klub om uit te vind hoe dié gevreesde visse in Suid-Afrikaanse omstandighede sou kan oorleef.”
Van Rensburg sê sy navorsing het hom ook opnuut bewus gemaak van die ernstige stroperkrisis in veral die Krugerwildtuin, “waar letterlik honderde stroperbendes ons wilderfenis vernietig”.
Een van sy verhaallyne wat in die wildtuin afspeel, is ’n getroue weergawe van die wrede werklikheid daar, sê hy.
Hy beloof dat die boek genoeg verrassende kinkels en wendings het om die liefhebbers van misdaadfiksie op die punte van hul stoele te hou.
“Omdat Kassie allesbehalwe jou tradisionele macho-held so eie aan speurverhale is, onderskat die misdadigers hom gewoonlik gruwelik. Dit skep vir my allerlei moontlikhede wat ander skrywers van misdaadfiksie dalk nie altyd kan benut nie,” sê hy.
Dat dít ’n suksesresep is, word weerspieël deur die feit dat Van Rensburg se tweede boek, Kopskoot, reeds vyf keer herdruk is, sy debuutroman, Slagyster, onlangs herdruk is, en dat sy derde boek, Judaskus, een van verlede jaar se topverkopers was. V AsTygerBurger se lesers meer oor Pirana wil uitvind, is hulle welkom om aanstaande Donderdag die bekendstelling by die Dros by te woon. Dit begin om 18:00 vir 18:30 en toegang is gratis. Bargain Books sal boeke by die lokaal beskikbaar hê. Antwoord voor of op Maandag 23 Mei by RSVP@nb.co.za of 021 406 3477.
Top